by

OSOP NGE TENE BENE NGE PANCANG

Mumuger ku uten si murime
Boh kune die kati mujadi belang
Peden sebelum munuke
Bagi due engi urum abang

Gerak langkah pemulo
Beweh nge sedie pekakas i arang
I tamah mien tenege
Kati semperne iwanni mumancang

Nge kin tuah renye mubahgie
Ate si suke gerene bimang
Gere percume gere sie sie
Sana sipinte nge mujadi senang

Tetah pakat bersenuen mude
Uwah siijo kati tair ilang
Ari kerna delewe inih sisedie
Tamah mien renye tenege sikurang

Sabe i entong gere nguk lupe
Soboh porak lao sesire betanang
Pucuk silemi nge muloi mujangko
Dirin munerime ku mutik berdiang

Mubilang ulen berganti lao
Galak gere pure sentan mumanang
Senuen siara sawah muketike
I peltekken kire ari tangke i batang

Gerene muninget kin janyi sedenge
Sikerna gere pure senuen simudenang
Simulo sawah munengkipen rege
Sipuren tahe munemeng keranyang

Beruwes ate timul gerico
Ientongen bang die kati terang terang
Mungune mien ku awal pemulo
Isi keta die laing i masa berjuang

Dele nge meh gigih alak muneroco
Mujadi telege lauh siremenang
Nge ubah janyi ketane besilo
Ahere kin dewe sampe musirang

Bene nge pancang osop nge tene
Metus ke die tali si nge iregang
Taonne munikot gere ne mupunce
Kunehmi die kati enti rengang

Engi rum Abang kunulmi semile
Berakah wan sene enti mugerantang
Perempusen silues enti ne murime
Jerohmi bertene si nge berpancang

Gelah mi munengon ku deleni heme
Tuninen kire enti nye wan terang
Jeroh betaso iwanni kekire
Wanni nipi jege padihne enti sampe muang

Pinangan, 15 Mei 2020

Comments

comments

News